ប្រធានាធិបតី​បារាំង​លោក Emanuel Macron នឹង​ធ្វើជា​ម្ចាស់ផ្ទះ​ទទួល​បណ្ដា​មេដឹកនាំ​ក្នុង​ពិភពលោក និង​ក្រុម​អ្នកជំនាញ​នៅ​ទីក្រុង​ប៉ារីស​នៅ​ថ្ងៃ​ព្រហស្បតិ៍ (២២ មិថុនា​)​នេះ និង​ថ្ងៃ​សុក្រ (២៣ មិថុនា​) សម្រាប់​កិច្ចប្រជុំ​កំពូល​អាកាសធាតុ​ដែលមាន​គោលបំណង​កំណត់​ផែនទី​បង្ហាញផ្លូវ​សម្រាប់​ការបន្ធូរបន្ថយ​បន្ទុក​បំណុល​របស់​បណ្ដា​ប្រទេស​ដែលមាន​ចំណូល​ទាប ខណៈដែល​ផ្ដល់​មូលនិធិ​បន្ថែមទៀត​សម្រាប់​ហិរញ្ញប្បទាន​អាកាសធាតុ​។​   ​កិច្ចប្រជុំ​កំពូល​នេះ​នឹង​នាំមក​នូវ​មេដឹកនាំ​រាប់សិប​នាក់​ជួបជុំគ្នា​នៅក្នុង​រដ្ឋធានី​របស់​ប្រទេស​បារាំង​ដើម្បី​ស្វែងរក​ការ​ស្រប​មតិ​គ្នា​កម្រិត​កំពូល​លើ​មធ្យោបាយ​ជំរុញ​ជំហាន​រីកចម្រើន​នៃ​គំនិត​ផ្តួចផ្តើម​មួយចំនួន ដែល​កំពុង​ព្យាយាម​ដោះស្រាយ​នៅក្នុង​ស្ថាប័ន​នានា​ដូចជា ក្រុម​ប្រទេស​ទាំង​២០ (G20) មូលនិធិ​រូបិយវត្ថុ​ឣ​ន្ត​រ​ជាតិ​ឬ​IMF ធនាគារពិភពលោក និង​អង្គការសហប្រជាជាតិ ព្រមទាំង​បណ្ដា​ឥស្សរជន​មកពី​ប្រទេស​នានា​ដែល​រងគ្រោះ​យ៉ាងធ្ងន់ធ្ងរ​ដោយសារ​បញ្ហា​អាកាសធាតុ​ក្ដៅ​ខ្លាំង និង​បម្រែបម្រួល​អាកាសធាតុ​។​   ​ស​ន្ទ​ស្សន៍​ហានិភ័យ​អាកាសធាតុ​សកល​ឆ្នាំ ២០២១ ពី​ក្រុម​ស្រាវជ្រាវ​អាកាសធាតុ​អាល្លឺម៉ង់ Germanwatch បាន​បង្ហាញថា​ដែនដី​ពើ​តូ​រី​កូ និង​សហភាព​មី​យ៉ាន់​ម៉ា ដែល​រង​ផលប៉ះពាល់​ខ្លាំង​បំផុត​ដោយ​ព្រឹត្តិការណ៍​អាកាសធាតុ​ធ្ងន់ធ្ងរ​ចាប់ពី​ឆ្នាំ ២០០០ ដល់​ឆ្នាំ ២០១៩ បន្ទាប់មក​គឺ​ប្រទេស​ហៃ​ទី ហ្វីលីពីន ម៉ូ​ហ្សំ​ប៊ិក បា​ហា​ម៉ាស បង់​ក្លា​ដែ​ស ប៉ា​គី​ស្ថាន ថៃ និង​នេ​ប៉ាល់​។   ​រាប់​ចាប់ពី​ការបន្ធូរបន្ថយ​បំណុល រហូតដល់​ហិរញ្ញវត្ថុ​អាកាសធាតុ ប្រធានបទ​ជាច្រើន​នៅលើ​របៀបវារៈ​ទាំងនោះ លើកយក​ការផ្ដល់​យោបល់​ពី​ក្រុម​ប្រទេស​កំពុងអភិវឌ្ឍន៍​ដែល​ដឹកនាំ​ដោយ​នាយករដ្ឋមន្ត្រី​ប្រទេស​បា​បា​ដូ លោកស្រី Mia Mottley ដែល​ត្រូវបាន​គេ​ហៅថា '​គិ​និ​ត​ផ្ដួចផ្ដើម​ហិរញ្ញប្បទាន​អាកាសធាតុ Bridgetown' ។​   ​ទោះបីជា​ការសម្រេច​មាន​ចំណង​ផ្លូវច្បាប់​មួយ​មិន​ត្រូវបាន​គេ​រំពឹងទុក​ក៏ដោយ ក៏​ក្រុមមន្ត្រី​ដែល​ពាក់ព័ន្ធ​នៅក្នុង​ផែនការ​នៃ​កិច្ចប្រជុំ​កំពូល បាន​និយាយថា ការប្តេជ្ញាចិត្ត​ដ៏​ខ្លាំងក្លា​មួយចំនួន​គួរតែ​ត្រូវបាន​ធ្វើឡើង​ស្តីពី​ការផ្តល់​ហិរញ្ញប្បទាន​ដល់​បណ្ដា​ប្រទេស​ក្រីក្រ​៕  

អ្នកវិទ្យាសាស្រ្តម្នាក់ និងជាអ្នកសារព័ត៌មានដែលបានមុជទឹកទៅកាន់បំណែកនាវា Titanicកាលពីរយៈពេល ២ទសវត្សរ៍មុន និយាយកាលពីថ្ងៃពុធថា ត្រូវតែមានកំហុសដ៏​មហន្តរាយ​សម្រាប់​នាវាមុជទឹកផ្សងព្រេងTitanរបស់ក្រុម ហ៊ុនទេសចរណ៍ OceanGate ដែលបានបាត់កាលពីថ្ងៃអាទិត្យ ។    លោក​វេជ្ជបណ្ឌិត Michael Guillen គឺជាអតីតអ្នកនិពន្ធផ្នែកវិទ្យាសាស្រ្តនៅទូរទស្សន៍ ABC News ដែលបាន ជាប់នៅក្នុងស្លាបចក្រនាវា Titanicហើយនិ​ងរស់រានពី​ដំណើរផ្សងព្រេងកាលពីឆ្នាំ២០០០ និយាយប្រាប់ទីភ្នាក់ងារព័ត៌មានរ៉យទ័រ មាននូវភស្តុតាងដែលងាយយល់ពីករណីមួយនេះ ។    យោង​តាមការអះអាងរបស់លោកវេជ្ជបណ្ឌិត Guillen បានឲ្យដឹងថា ជាដំបូង ការពិតដែលនាវាបាត់ការទំនាក់ទំនង គឺលឿនពេក ពេលចុះទឹកដែលចំណាយពេលសរុបចន្លោះ ២ម៉ោង និង ៣ម៉ោងប៉ុណ្ណោះ ។    លោក Guillen បានពន្យល់ផងដែរថា ការខកខានគ្រាន់តែទំនាក់ទំនង គឺមិនអាចទៅរួចនោះទេ ដោយសារនាវាមុជទឹក Titanត្រូវបានរចនាឡើងដើម្បីងើបទឹកដោយស្វ័យប្រវត្តិ ក្នុងករណីដែលជួបវិបត្តិ ដែលករណីនេះពុំធ្លាប់កើតឡើងនោះទេ ។    យោងតាមសម្តីរបស់លោក Guillen សំឡេងក្រោមបាតសមុទ្រដែលត្រូវបានរកឃើញនៅតំបន់រុករកនៅសមុទ្រអាត្លង់ទិកខាងជើង គឺជាសញ្ញាវិជ្ជមាន ប៉ុន្តែវាពុំអាចធានាបាននោះទេ ពីព្រោះថា បើសិនជានាវាមុជទឹកត្រូវបានរកឃើញពិតមែន ការស្រង់វា នឹងជាប់ពាក់ព័ន្ធកម្រិតភាពស្មុគស្មាញខុសប្លែកគ្នា ៕  

យានបញ្ជាពីចម្ងាយ (ROV)មួយគ្រឿង កំពុងត្រូវបានរៀបចំផ្ទុកនៅក្នុងយន្តហោះ C-17 នៅឯអាកាសយានដ្ឋាន Jersey ចក្រភពអង់គ្លេសនៅថ្ងៃព្រហស្បតិ៍ (២២ មិថុនា)នេះ ក្នុងប្រត្តិបត្តិការស្វែងរកនាវាមុជទឹកទេសចរណ៍ដែលបានបាត់នៅពេលមុជទឹកទៅមើលបំណែកនៃកប៉ាល់ទីតានិក។ អនុក្រុមហ៊ុន Magellan របស់ចក្រភពអង់គ្លេស ឈ្មោះថា Juliet ពីមុនបានស្កែនបំណែកនៃកប៉ាល់នោះដោយបង្កើតរូបភាពបីវិមាត្រ (ស្រ៊ីឌី-3D) នៃកប៉ាល់ទីតានិច។   ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅពេលដែលយន្តហោះចាកចេញពីព្រលាន វានឹងចំណាយពេល ៤៨ ម៉ោងដើម្បីទៅដល់ទីតាំងកប៉ាល់នោះ។ យាននោះត្រូវបានគេរាយការណ៍ថាត្រៀមដាក់បញ្ចូននៅដើមសប្តាហ៍នេះ ប៉ុន្តែត្រូវបានផ្អាកដោយត្រូវសុំការអនុញ្ញាតជាមុនសិន។ យោងតាមក្រុមហ៊ុន OceanGate ដែលមានមូលដ្ឋាននៅសហរដ្ឋអាមេរិកបានឱ្យដឹងថា នាវាមុជទឹក ទីតាន បានចេញដំណើរនៅម៉ោង៨ព្រឹកម៉ោងក្នុងស្រុកកាលពីថ្ងៃអាទិត្យ (១៨ មិថុនា) ជាមួយនឹងខ្យល់ដកដង្ហើមបាន៩៦ម៉ោង មានន័យថាធុងអុកស៊ីសែនរបស់នាវានោះទំនងជានឹងត្រូវអស់នៅពេលណាមួយនៅព្រឹកថ្ងៃព្រហស្បតិ៍នេះ។ ក្រុមអ្នកជំនាញបាននិយាយថា ខ្យល់ដកដង្ហើមនឹងស្ថិតនៅបានយូរប៉ុណ្ណានោះគឺអាស្រ័យលើកត្តាផ្សេងៗដូចជាថាតើនាវាមុជទឹកនៅមានថាមពលដែរឬអត់ និងការភាពស្ងប់ស្ងៀមនៃមនុស្សដែលនៅលើនាវានោះ។   ទោះបីជាយ៉ាងណាក៏ដោយ ការរាប់ថយក្រោយចំពោះការថយចុះអុកស៊ីសែន គ្រាន់តែជាកាលបរិច្ឆេទកំណត់សម្មតិកម្មប៉ុណ្ណោះ ដោយសន្មត់ថានាវាដែលបាត់នោះមិនមានការខូចខាត ជាជាងជាប់ ឬខូចនៅក្នុងជម្រៅសមុទ្រដ៏ជ្រៅដែលនៅជិតបាតសមុទ្រនោះ៕ ប្រភព៖ BTV INTERNATIONAL   

សេចក្ដីជូនដំណឹង នាយកដ្ឋានប្រឆាំងបទល្មើសបច្ចេកវិទ្យា បានទទួលពត៌មានស្តីពីការបោកបញ្ឆោតថ្មីដល់អ្នកប្រើប្រាស់កម្មវិធី Telegram តាមរយៈការផ្ញើដំណរភ្ជាប់បោកបញ្ឆោត (Fake Link ក្លែងក្លាយ ដូចភ្ជាប់ក្នុងរូបភាពខាងក្រោម) ទៅកាន់សារទូរស័ព្ទ SMS ដើម្បីអោយអ្នកប្រើប្រាស់កម្មវិធី Telegram បំពេញព័ត៌មាន និងឈានទៅដល់ការយកគណនីអ្នកប្រើប្រាស់មកគ្រប់គ្រងពីជនអានាមិក។ អាស្រ័យដូច្នេះ សូមអ្នកប្រើប្រាស់កម្មវិធី Telegram ទាំងអស់មេត្តាប្រុងប្រយ័ត្ន និងកុំចុចលើដំណរភ្ជាប់ ដូចមានក្នុងរូបភាពខាងក្រោម ឬដំណរភ្ជាប់ណាដែលមិនច្បាស់លាស់ និងបំពេញព័ត៌មានផ្ទាល់ខ្លួនអោយសោះ៕

នៅព្រឹកថ្ងៃទី២២ ខែមិថុនា ឆ្នាំ២០២៣ ឯកឧត្តម គី​ម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំកិច្ចប្រជុំពិភាក្សាលើសេចក្តីសម្រេចស្តីពី ការ​បង្កើតក្រុមការងាររៀបចំទិវាជាតិគ្រប់គ្រងគ្រោះមហន្តរាយ ថ្ងៃទី១៣ តុលា ឆ្នាំ២០២៣ ។ ដោយមានការចូលរួមពី ឯកឧត្ដម អគ្គលេខាធិការរង លោក- លោកស្រី ប្រធាននាយកដ្ឋាន លោកអនុប្រធាន នាយកដ្ឋាន និងមន្ត្រីពាក់ព័ន្ធមួយចំនួន។

(ភ្នំពេញ)៖ ក្រសួងធនធានទឹក និងឧតុនិយម បានចេញសេចក្តីជូនដំណឹង ស្ដីពី ស្ថានភាពធាតុអាកាស ចាប់ពីថ្ងៃទី២១ ដល់ថ្ងៃទី២៧ ខែមិថុនា ឆ្នាំ២០២៣។ ក្រសួងបញ្ជាក់ថា ក្នុងរយៈពេលមួយសប្ដាហ៍នេះ ព្រះរាជាណាចក្រកម្ពុជា នឹងទទួលឥទ្ធិពលពីជ្រលងនៃតំបន់សម្ពាធ ទាបនៅលើប្រទេសចិន និងខ្យល់មូសុងនិរតីក្នុងកម្រិតមធ្យម។ លក្ខណៈបែបនេះនឹងធ្វើឲ្យ៖ ១៖តំបន់ទំនាបកណ្តាល* សីតុណ្ហភាពអប្បបរមា មានពី ២៤-២៦ °C* សីតុណ្ហភាពអតិបរមា មានពី ៣៤-៣៦ C* អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់ ។ ២៖ តំបន់ខ្ពង់រាប* សីតុណ្ហភាពអប្បបរមា មានពី ២៤-២៦ °C* សីតុណ្ហភាពអតិបរមា មានពី ៣៣-៣៥ °C* អាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់ ។ ៣៖ តំបន់មាត់សមុទ្រ* សីតុណ្ហភាពអប្បបរមា មានពី ២៥-២៧ °C* សីតុណ្ហភាពអតិបរមា មានពី ៣១-៣៣ °C* អាចមានភ្លៀងធ្លាក់ក្នុងកម្រិតពីខ្សោយទៅមធ្យម លាយឡំដោយផ្គរ រន្ទះ និងខ្យល់កន្ត្រាក់។ ជាមួយគ្នានេះ ក្រសួងធនធានទឹក អំពាវនាវឲ្យបង្កើនការប្រុងប្រយ័ត្ន ចំពោះបាតុភូតធម្មជាតិ ដែលអាចកើតមានឡើង ជាយថាហេតុ ៕

សេចក្តីជូនដំណឹង ចុះថ្ងៃទី១២ ខែមករា ឆ្នាំ២០២១ ស្តីពីស្ថានភាពធាតុអាកាស (ចាប់ពីថ្ងៃទី១៣-១៩ ខែមករា ឆ្នាំ២០២១) របស់ក្រសួងធនធានទឹក និងឧតុនិយម

ចំហេះព្រៃរាប់រយករណីដែលមិនអាចគ្រប់គ្រងបាន បានឆាបឆេះនៅទូទាំងប្រទេសកាណាដាកាលពីថ្ងៃពុធ (៧ មិថុនា) ដែលគំរាមកំហែងដល់ហេដ្ឋារចនាសម្ព័ន្ធសំខាន់ៗ បង្ខំឱ្យមាន ការ​ជម្លៀសប្រជាជន និងបានបញ្ជូនផ្សែងដ៏អួរអាប់គ្របដណ្ដប់លើទីក្រុងនានារបស់សហរដ្ឋអាមេរិក។ ចំហេះព្រៃគឺជារឿងធម្មតានៅក្នុងខេត្តភាគខាងលិចនៃប្រទេសកាណាដា ប៉ុន្តែនៅឆ្នាំនេះអណ្តាតភ្លើងបានឆាបឆេះយ៉ាងឆាប់រហ័សនៅភាគខាងកើតរបស់ប្រទេស ដែលធ្វើឱ្យវាក្លាយជា​ការ​ចាប់ផ្តើម​រដូវកាលដ៏អាក្រក់បំផុតមិនធ្លាប់មាន។ ភាគខាងត្បូងនៃព្រំដែន មានរដ្ឋជាច្រើនរបស់សហរដ្ឋអាមេរិកបានស្ថិតនៅក្រោមការជូនដំណឹងអំពីគុណភាពខ្យល់កាលពីថ្ងៃពុធ ខណៈដែលផ្សែងហុយចេញពីចំហេះព្រៃបានបក់ទៅភាគខាងត្បូង។ ការចាប់ផ្តើមដំបូងនៃរដូវចំហេះព្រៃខ្លាំងខុសពីធម្មតា បានធ្វើឱ្យប្រទេសកាណាដា ប្រឈមនឹងការបំផ្លិចបំផ្លាញពីភ្លើងដ៏អាក្រក់បំផុតមិនធ្លាប់មានប្រចាំឆ្នាំរបស់ខ្លួន ខណៈដែលអាកាស​ធាតុ​ក្តៅ និងស្ងួតត្រូវបានគេរំពឹងថានឹងបន្តកើតមានជាច្រើនខែ។ ក្រុមអាជ្ញាធរបាននិយាយថា អ្នកពន្លត់អគ្គិភ័យប្រហែល ៥២០នាក់កំពុងប្រយុទ្ធនឹងចំហេះព្រៃនេះ។ យោង​តាមក្រុមអាជ្ញាធរបានឱ្យដឹងថា មនុស្សប្រហែល ១១.៤០០ នាក់ត្រូវបានជម្លៀសចេញពីតំបន់ដាច់ស្រយាលនៃភាគខាងជើងទីក្រុងកេបិច ហើយមនុស្ស ៤.០០០នាក់ទៀត​នឹងត្រូវ​ជម្លៀសចេញក្នុងពេលឆាប់ៗនេះ៕  

អ៊ុយក្រែន៖ មនុស្សរាប់រយនាក់ ត្រូវបានជួយសង្គ្រោះចេញពីដំបូលផ្ទះនានា ២ថ្ងៃបន្ទាប់ពី ទឹកហូរចេញពីទំនប់វារីអគ្គិសនីដែលត្រូវបានបំផ្លាញបានជន់លិចភូមិឋាន ដីកសិកម្ម ផ្លូវថ្នល់ ជាច្រើននៅក្នុងតំបន់ Khersonភាគខាងត្បូងខណៈអ៊ុយក្រែនច្រានចោលរបាយការណ៍នានាដែលថាយោធារបស់ខ្លួនបានចាប់ផ្ដើមបើកការវាយបកលើកងកម្លាំងរុស្ស៊ីនោះ។   វីដេអូពីលើអាកាសបានបង្ហាញតំបន់នានាជាទីដែលទឹកជន់លិចលំនៅឋានមើលឃើញតែដំបូល។  អភិបាលតំបន់នេះ បាននិយាយថា ផ្ទៃដីប្រមាណ៦០០គីឡូម៉ែត្រក្រឡា  ត្រូវបានទឹកលិចកាលពីថ្ងៃព្រហស្បតិ៍ ។  ការបាក់ទំនប់ទឹក Nova Kakhovka បានកើតឡើង ខណៈអ៊ុយក្រែន ត្រៀមវាយបកដែលទំនងជាដំណាក់កាលសំខាន់បន្ទាប់ ក្នុងសង្រ្គាម ដែលបានឆក់យកជីវិតមនុស្សរាប់ម៉ឺននាក់ លំនៅឋានរាប់លានខ្នងដួលរាបដល់ដី និងទីក្រុងទាំងមូលត្រូវបានបំផ្លាញ ចាប់តាំងពីប្រតិបត្តិការសឹកពិសេសរបស់រុស្ស៊ី កាលពីថ្ងៃទី២៤ខែកុម្ភៈឆ្នាំមុន។    

          (កំពង់ធំ)៖ ប្រទេសកម្ពុជា ជាប្រទេសមួយដែលទទួលការជន់លិចដោយទឹកទន្លេមេគង្គ និងជំនន់ទឹកភ្លៀងស្ទើរតែជារៀងរាល់ឆ្នាំ។ ការជន់លិចនេះ ក្រៅតែពីធ្វើឱ្យប៉ះពាល់ដល់ផលដំណាំហើយ វាក៏បានបង្កការជន់លិចផ្ទះសម្បែងរបស់ប្រជាពលរដ្ឋផងដែរ។ នៅពេលមានទឹកជំនន់ម្តងៗប្រជាពលរដ្ឋរាប់រយគ្រួសារត្រូវបានជម្លៀសទៅរកទីទួលសុវត្ថិភាព។ បញ្ហាប្រឈមរបស់ពួកគេពេលជម្លៀសទៅទីទួលសុវត្ថិភាពនោះ គឺខ្វះទីជម្រក ខ្វះបង្គន់អនាម័យ និងខ្វះទឹកស្អាតប្រើប្រាស់ជាដើម។ ដើម្បីដោះស្រាយបញ្ហាប្រឈមនេះ រាជរដ្ឋាភិបាលកម្ពុជា តាមរយៈគណៈកម្មាធិការជាតិគ្រប់គ្រងគ្រោះមហន្តរាយ ដោយមានកិច្ចគាំទ្រពីអង្គការស្បៀងអាហារពិភពលោក ក្រោមការជ្រោមជ្រែងពីរដ្ឋាភិបាលជប៉ុននោះ បានសម្រេចសាងសង់អគារទីទួលសុវត្ថិភាព ដើម្បីសម្រួលដល់ការស្នាក់អាស្រ័យរបស់ប្រជាពលរដ្ឋពេលជម្លៀសពីទឹកជំនន់។ តាមរយៈកិច្ចសហប្រតិបត្តិការរវាងគណៈកម្មាធិការជាតិគ្រប់គ្រងគ្រោះមហន្តរាយ និងអង្គការស្បៀងអាហារពិភពលោក ក្រោមការជួយឧបត្ថម្ភថវិកាដោយរដ្ឋាភិបាលជប៉ុននោះ អគារទីទួលសុវត្ថិភាពចំនួន៦ហើយ ត្រូវបានសាងសង់រួចរាល់ ដោយចំណាយថវិកាជាង ១លានដុល្លារអាមេរិក។ ខេត្តដែលត្រូវបានសាងសង់អគារទីទួលសុវត្ថិភាពនេះ រួមមានខេត្តពោធិ៍សាត់ កំពង់ធំ និងកំពង់ឆ្នាំង។ ទីទួលសុវត្ថិភាពនេះ ត្រូវបានធ្វើឡើងស្របតាមបទដ្ឋានអន្តរជាតិ ដោយមានបំពាក់ឧបករណ៍ការពាររន្ទះ, ផ្ទះបាយ, បន្ទប់ទឹកស្រី-ប្រុស, កន្លែងផ្គត់ផ្គង់ទឹកស្អាតប្រើប្រាស់, កន្លែងបោក និងអាលខោអាវ, កន្លែងលាងដៃ, កន្លែងក្មេងលេង, ឃ្លាំងសម្ភារៈ និងបំពាក់ម៉ាស៊ីនភ្លើងជាដើម។ អគារទីទួលសុវត្ថិភាពក្នុងខេត្តពោធិ៍សាត់ត្រូវបានសម្ពោធដាក់ឱ្យប្រើប្រាស់នៅថ្ងៃទី២១ ខែឧសភា ឆ្នាំ២០២១។ រីឯអគាទីទួលសុវត្ថិភាពក្នុងខេត្តកំពង់ធំ ត្រូវបានសម្ពោធដាក់ឱ្យប្រើប្រាស់នៅថ្ងៃទី២២ ខែឧសភា ឆ្នាំ២០២១នេះ ក្រោមអធិបតីភាពលោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ, លោក ការិម៉ាតា អាត្សឹស៊ី ឧបការីស្ថានទូតជប៉ុន និងលោកស្រី ឃ្លែរ ខូណាន់ នាយិកាអង្គការកម្មវិធីស្បៀងអាហារពិភពលោកប្រចាំកម្ពុជា។ កម្មវិធីនេះ ក៏មានការចូលរួមពីលោក សុខ លូ អភិបាលខេត្តកំពង់ធំ ព្រមទាំងមន្ត្រីរាជការក្នុងខេត្តមួយចំនួនទៀត។ លោកទេសរដ្ឋមន្ត្រី គន់ គីម បានថ្លែងអបអរសាទរចំពោះសមិទ្ធផលអគារទីទួលសុវត្ថិភាពទាំងនេះ។ លោកបានលើកឡើងថា រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន តែងតែគិតគូរខ្ពស់លើការងារប្រយុទ្ធប្រឆាំងនឹងគ្រោះមហន្តរាយ។ បន្ថែមពីលើនោះ ជារៀងរាល់ឆ្នាំនៅពេលមានគ្រោះមហន្តរាយ ដូចជាករណីជំនន់ទឹកភ្លៀងកាលពីឆ្នាំ២០២១ សម្តេចតេជោ ហ៊ុន សែន និងមន្ត្រីជាសេនាធិការបានស្រុះគ្នាក្នុងការជួយដល់ប្រជាពលរដ្ឋ។ លោកទេសរដ្ឋមន្ត្រី គន់ គីម បានហៅការបង្កើតឡើងនូវអគារទីទួលសុវត្ថិភាពនេះ គឺជាការគិតគូរ និងឆ្លើយតបមួយជំហានទៀតរបស់រាជរដ្ឋាភិបាលកម្ពុជា ដើម្បីដោះស្រាយការលំបាករបស់ប្រជាពលរដ្ឋនៅពេលជួបទឹកជំនន់នោះ។ លោកទេសរដ្ឋមន្ត្រី បានថ្លែងយ៉ាងដូច្នេះ «គ្រោះមហន្តរាយធម្មជាតិនៅលើពិភពលោក គឺកាន់តែស្រួចស្រាវ ដែលពិបាកនឹងទៅហាមឃាត់ចំពោះគ្រោះមហន្តរាយទាំងនេះ។ តែអ្វីដែលយើងអាចធ្វើបាន គឺយើងត្រូវប្រឹងរិះរកវិធីធ្វើយ៉ាងណា ដើម្បីឆ្លើយតបគ្រោះមហន្តរាយនោះឱ្យបានទាន់ពេលវេលា។ ជាពិសេសជួយប្រជាពលរដ្ឋពីគ្រោះមហន្តរាយកុំឱ្យមានអ្នកស្លាប់ និងមានកន្លែងស្នាក់នៅឱ្យបានសមរម្យ»។ «អគារទីទួលសុវត្ថិភាពនេះ ជាការឆ្លើយតបរបស់រាជរដ្ឋាភិបាលទៅនឹងគ្រោះមហន្តរាយ ដើម្បីផ្តល់កន្លែងស្នាក់អាស្រ័យបណ្តោះអាសន្នឱ្យបានសមរម្យពេលពួកគាត់ជម្លៀសចេញពីផ្ទះសម្បែង»។ នេះជាការបញ្ជាក់បន្ថែមរបស់លោកទេសរដ្ឋមន្ត្រី គន់ គីម។ លោកស្រី ឃ្លែរ ខូណាន់ នាយិកាអង្គការកម្មវិធីស្បៀងអាហារពិភពលោកប្រចាំកម្ពុជា បានលើកឡើងថា ប្រទេសកម្ពុជា គឺជាប្រទេសមួយក្នុងចំណោមប្រទេសដែលងាយទទួលរងផលប៉ះពាល់ពីការប្រែប្រួលធាតុអាកាស ដូចជាទឹកជំនន់ និងគ្រោះរាំងស្ងួត។ លោកស្រីបន្តថា ការស្ថាបនាមជ្ឈមណ្ឌលទាំងនេះ គឺជាផ្នែកមួយនៃភាពជាដៃគូយូរអង្វែងរវាងកម្មវិធីស្បៀងអាហារពិភពលោក និងគណៈកម្មាធិការជាតិគ្រប់គ្រងគ្រោះមហន្តរាយ និងដើម្បីពង្រឹងការត្រៀម និងការឆ្លើយតបជាបន្ទាន់នៅក្នុងប្រទេស។ ប្រទេសជប៉ុនគឺជាដៃគូដ៏រឹងមាំរបស់កម្មវិធិស្បៀងអាហារពិភពលោក។ ក្នុងរយៈពេលមួយទសវត្សរ៍ចុងក្រោយនេះ ប្រទេសជប៉ុន បានចូលរួមផ្តល់វិភាគទានជាថវិកាចំនួនជាង ២២លានដុល្លាអាមេរិក ដើម្បីលើកកម្ពស់សន្តិសុខស្បៀងនិងអាហារូបត្ថម្ភ និងគ្រោះមហន្តរាយនៅកម្ពុជា។ លោក ការិម៉ាតា អាត្សឹស៊ី ឧបការីស្ថានទូតជប៉ុន បានថ្លែងក្នុងពិធីនោះថា គម្រោងផ្តល់ហិរញ្ញប្បទានដោយប្រទេសជប៉ុន និងអនុវត្តដោយកម្មវិធីស្បៀងអាហារពិភពលោកមានគោលបំណងកាត់បន្ថយហានិភ័យគ្រោះមហន្តរាយនៅតាមតំបន់ងាយរងគ្រោះដោយទឹកជំនន់ មានដូចជាការសាងសង់មជ្ឈមណ្ឌលជម្លៀសជនរងគ្រោះ, បណ្តុះបណ្តាលមន្ត្រីស្តីពីការគ្រប់គ្រងហានិភ័យគ្រោះមហន្តរាយរួមមានការវាយតម្លៃហានិភ័យ និងការឆ្លើយតបជាបន្ទាន់ និងបង្កើតប្រព័ន្ធព័ត៌មានគ្រប់គ្រងគ្រោះមហន្តរាយសម្រាប់ការជម្លៀសជាដើម។ លោក ការិម៉ាតា អាត្សឹស៊ី បានបន្ថែមថា រដ្ឋាភិបាលជប៉ុនមានមោទនភាពក្នុងការជួយសហគមន៍កម្ពុជា ក្នុងការកសាងភាពធន់ទប់ទល់ការប្រឈមនឹងគ្រោះថ្នាក់ធម្មជាតិ។ មន្ត្រីជាន់ខ្ពស់ស្ថានទូតជប៉ុនរូបនេះ ក៏បានផ្តល់ទស្សនៈឱ្យកម្ពុជា ត្រៀមខ្លួនឱ្យបានកាន់តែប្រសើរថែមទៀតលើការដោះស្រាយបញ្ហាគ្រោះមហន្តរាយ ដូចជាការធ្វើលំហាត់សមយុទ្ធនានា ដើម្បីត្រៀមជួយសង្គ្រោះជនរងគ្រោះពេលមានគ្រោះមហន្តរាយ។ លោកឧបការីទូតជប៉ុន បានលើកឡើងថា បច្ចុប្បន្នកម្ពុជាប្រឈមមុខនឹងស្ថានភាពកាន់តែលំបាកថែមទៀតមិនត្រឹមតែដោយសារទឹកជំនន់ប៉ុណ្ណោះទេ រួមទាំងជំងឺរាតត្បាតកូវីដ១៩ផងដែរ។ លោកសង្ឃឹមថា មជ្ឈមណ្ឌលទាំងនេះ មិនត្រឹមតែប្រើសម្រាប់ជម្លៀសពលរដ្ឋពេលមានទឹកជំនន់នោះទេ តែក៏អាចប្រើក្នុងករណីចាំបាច់ដទៃទៀត ដូចជាការចាក់វ៉ាក់សាំងជាដើម។ លោកទេសរដ្ឋមន្ត្រី គន់ គីម បានថ្លែងអំណរគុណអង្គការស្បៀងអាហារពិភពលោក និងរដ្ឋាភិបាលជប៉ុន ដែលតែងតែជួយគាំទ្រដល់ការងារគ្រប់គ្រង និងឆ្លើយតបចំពោះគ្រោះមហន្តរាយ ដូចជាការផ្តល់ថវិកាជួយសាងសង់អគារទីទួលសុវត្ថិភាពនេះជាដើម។ លោកទេសរដ្ឋមន្ត្រី បានបន្តអំពាវនាវដល់អង្គការស្បៀងអាហារពិភពលោក និងរដ្ឋាភិបាលជប៉ុន បន្តជួយសាងសង់អគារទីទួលសុវត្ថិភាព នៅតាមបណ្តាខេត្តជាប់បឹងទន្លេសាប និងខេត្តតាមដងទន្លេមេគង្គ ដែលសុទ្ធជាតំបន់ងាយរងគ្រោះដោយទឹកជំនន់ន។ ក្នុងឱកាសនោះ លោកទេសរដ្ឋមន្ត្រី គន់ គីម បានក្រើនរំលឹកមន្ត្រីគណៈកម្មាធិការជាតិគ្រប់គ្រងគ្រោះមហន្តរាយ និងមន្ត្រីខេត្តយកចិត្តទុកដាក់ថែទាំអគារទីទួលសុវត្ថិភាពនេះឱ្យបានល្អប្រសើរ ដើម្បីបម្រើភាពចាំបាច់ពេលមានគ្រោះមហន្តរាយ៕